Radio Kailash 103.4 MHz

कांग्रेस अधिवेशन नजिकिँदै गर्दा सांसद रोकाया हुम्लामा

| २०८३ भदौ ३१ बुधबार

हुम्ला — नेपाली कांग्रेसको १५औँ महाधिवेशनअन्तर्गत अधिवेशन प्रक्रिया अघि बढ्नै लाग्दा हुम्लाबाट निर्वाचित प्रतिनिधिसभा सदस्य जयपति रोकाया लामो समयपछि गृहजिल्ला हुम्ला पुग्नुभएको छ। असोज ३ र ४ गतेदेखि वडा अधिवेशन सुरु हुने भएपछि जिल्लामा कांग्रेसको संगठनात्मक गतिविधि पनि बढ्न थालेको छ।

रोकायाको हुम्ला आगमनलाई पार्टीको अधिवेशन तयारीसँगै जिल्लाका नेता–कार्यकर्ता तथा क्रियाशील सदस्यसँगको भेटघाट र संगठनात्मक छलफलका रूपमा हेरिएको छ। प्रतिनिधिसभा सदस्यमा निर्वाचित भएपछि पहिलोपटक लामो समय गृहजिल्लामा रहने गरी पुग्नुभएका रोकायाले अधिवेशन प्रक्रिया र संगठनका विषयमा जिल्लाका नेता–कार्यकर्तासँग छलफल गर्ने तयारी गर्नुभएको सचिबालय श्रोतले जनाएको छ।
यसअघि २ कार्यकाल नेपाली कांग्रेस हुम्लाको जिल्ला सभापतिसमेत भैसकेका नेता रोकाया नेपाली कांग्रेसको केन्द्रीय तहमा महाधिवेशनलाई लिएर संवाद, सहमति र सहभागिताको प्रयास भएसंगै सभापति गगनकुमार थापाले असोज ३ र ४ गते हुने वडा अधिवेशनमा सहभागी हुन पार्टीका क्रियाशील सदस्य, नेता तथा कार्यकर्तालाई आह्वान गर्नुभएको छ।

हुम्लामा भने वडा तहदेखि सुरु हुने अधिवेशनले पार्टीको आगामी जिल्ला तथा केन्द्रीय प्रतिनिधित्वको आधार तयार गर्ने भएकाले अधिवेशनलाई महत्वका साथ हेरिएको छ। रोकायाको जिल्ला आगमनसँगै हुम्ला कांग्रेसको संगठनात्मक अवस्था, अधिवेशनको तयारी र आगामी नेतृत्व तथा प्रतिनिधित्वका विषयमा जिल्लास्तरमा छलफल तीव्र हुने देखिएको छ।

कांग्रेसको संशोधित कार्यतालिकाअनुसार असोज ३ र ४ गते वडा अधिवेशन, असोज ७ गते पालिका अधिवेशन, असोज १० गते प्रदेशसभा तथा प्रतिनिधिसभा क्षेत्रीय अधिवेशन र असोज १६ देखि १९ गतेसम्म केन्द्रीय महाधिवेशन गर्ने कार्यक्रम छ।