Radio Kailash 103.4 MHz

पहिरोले कर्णाली करिडोरको ग्युसी–खार्पु सडक अवरुद्ध

| २०८३ भदौ २९ सोमबार

हुम्ला — लगातारको वर्षापछि कर्णाली करिडोरको हुम्ला खण्डअन्तर्गत सर्केगाड गाउँपालिका–६ ग्युसीदेखि खार्पुनाथ गाउँपालिका–५ खार्पुसम्म विभिन्न स्थानमा पहिरो खसेपछि सडक अवरुद्ध भएको छ। कतिपय ठाउँमा पहिरोले सडक पूरै पुरिएको छ भने केही खण्डमा सडक साँघुरिएपछि जोखिम मोलेर सवारीसाधन सञ्चालन भइरहेका छन्।

कार्यालयको कामका लागि सदरमुकाम सिमकोट आएका चंखेली गाउँपालिकाका स्वास्थ्य संयोजक सुरवीर शाहीका अनुसार ग्युसीदेखि खार्पुसम्मको सडकका विभिन्न ठाउँमा माथिबाट ढुंगा, माटो र लेदोसहितको पहिरो खसेको छ । उनका अनुसार सडक अवरुद्ध भएपछि यात्रु तथा मालवाहक सवारीसाधनलाई आवतजावतमा समस्या भएको बताएका छन।

पहिरोका कारण दक्षिणी हुम्लाबाट सदरमुकाम सिमकोटतर्फ आउने–जाने यात्रु प्रभावित भएका छन्। करिडोर हुँदै खाद्यान्न, दैनिक उपभोग्य वस्तु तथा निर्माण सामग्री ढुवानी हुने भएकाले सडक अवरोध लम्बिए आपूर्ति व्यवस्थासमेत प्रभावित हुन सक्ने व्यवसायीहरूको भनाइ छ।

वर्षा जारी रहेकाले सडकको अन्य खण्डमा समेत पहिरो खस्ने जोखिम छ। सडक खुलाउन तत्काल पहिरो पन्छाउन मेसिन सहित प्राबिधिक स्टेनबाई अवस्था रहे पनि लगातारको वर्षाले काम गर्न कठिनाइ भएको हिल्सा सिमकोट सडक आयोजनाका प्रमुख ईन्जिनियर बेलबहादुर नेपालीले बताएका छन।

कर्णाली करिडोर हुम्लाको बाहिरी जिल्लासँगको प्रमुख स्थलमार्ग हो। वर्षायाममा पहिरोका कारण करिडोर पटक–पटक अवरुद्ध हुँदा यातायातसँगै जिल्लाको आपूर्ति व्यवस्था प्रभावित हुँदै आएको छ। स्थानीयले जोखिमयुक्त स्थानमा पहिरो नियन्त्रण तथा पानी निकासको दीर्घकालीन व्यवस्था गर्न माग गरेका छन्।

करिडोर पटक–पटक अवरुद्ध हुने सडकबाट बाह्रै महिना भरपर्दो सडकमा रूपान्तरण गर्न नसकिए हुम्लाको सडक पहुँच र आपूर्ति प्रणाली अझै प्राकृतिक विपत्तिको जोखिममै रहने देखिन्छ।